ఇంట్లోనే చిన్న పరీక్షల ద్వారా కొన్ని కల్తీలను గుర్తించే అవకాశం ఉందని నిపుణులు చెబుతున్నారు. ఉదాహరణకు, పాలను వాలుగా ఉన్న ఉపరితలంపై చుక్క వేసినప్పుడు అది తెల్లటి గీత వదలకుండా వేగంగా జారిపోతే నీరు లేదా డిటర్జెంట్ కలిసిన అనుమానం వ్యక్తమవుతుంది. అలాగే కూరగాయలపై వంట నూనెలో ముంచిన దూదిని రుద్దినప్పుడు రంగు అంటుకుంటే మలాకైట్ గ్రీన్ వంటి రసాయన రంగులు వాడినట్టు భావించాలి. పసుపును నీటిలో వేసినప్పుడు నీరు ముదురు పసుపు రంగులోకి మారితే మెటానిల్ ఎల్లో కలిపి ఉండే అవకాశముందని హెచ్చరిస్తున్నారు. అయితే ఈ పరీక్షలు ప్రాథమిక సూచనల మాత్రమేనని, అనుమానం ఉంటే అధికారులకు సమాచారం ఇవ్వడం మంచిదని సూచిస్తున్నారు.
ప్యాక్ చేసిన ఆహార పదార్థాలు కొనుగోలు చేసే సమయంలో లేబుల్స్ చదవడం అలవాటు చేసుకోవాలని నిపుణులు పేర్కొంటున్నారు. పదార్థాల జాబితా, INS నంబర్లు, గడువు తేదీ వంటి వివరాలను పరిశీలించడం ద్వారా ప్రమాదాన్ని కొంతవరకు తగ్గించుకోవచ్చు. ముఖ్యంగా ఆహార భద్రత ప్రమాణాలను సూచించే Food Safety and Standards Authority of India (FSSAI) లోగో ఉన్న ఉత్పత్తులను మాత్రమే కొనాలని అధికారులు సూచిస్తున్నారు.
అలాగే వీలైనంత వరకు స్థానిక రైతుల నుంచి లేదా నమ్మకమైన సేంద్రీయ దుకాణాల నుంచి ఆహార పదార్థాలు కొనడం మంచిదని వ్యవసాయ నిపుణులు చెబుతున్నారు. ఇంటి వద్ద చిన్న స్థాయిలో కిచెన్ గార్డెన్ ఏర్పాటు చేసుకోవడం ద్వారా కనీసం కొన్ని కూరగాయల విషయంలో రసాయనాల భారం తగ్గించుకోవచ్చని అభిప్రాయపడుతున్నారు.
ఎక్కడైనా కల్తీపై అనుమానం వచ్చినప్పుడు మౌనంగా ఉండకుండా ఫిర్యాదు చేయడం ప్రతి పౌరుడి బాధ్యతగా అధికారులు గుర్తుచేస్తున్నారు. ఇందుకోసం Food Safety and Standards Authority of India రూపొందించిన Food Safety Connect యాప్ లేదా టోల్ ఫ్రీ నంబర్ 1800112100 ద్వారా సమాచారం అందించవచ్చు. ప్రజల అప్రమత్తత పెరిగితేనే ఆహార కల్తీపై సమర్థంగా నియంత్రణ సాధ్యమవుతుందని నిపుణులు స్పష్టం చేస్తున్నారు.
0 Comments